2 Kings 23
1 約西亞王派人召集猶大㧯耶路撒冷所有个領袖。
2 王㧯猶大眾人、住在耶路撒冷个人、還有祭司、先知，㧯所有个人民，無論貧富，也全部共下到上主个聖殿去。王就將該在聖殿肚發現个約書全部讀給佢等聽。
3 王企在大柱堘頭，向上主立約，愛聽從上主，一心一意遵守佢个法律誡命，並實行約書上所規定个命令。所有个人民也全部答應遵守這約。
4 所以，約西亞王吩咐大祭司希勒家、佢个助理祭司，還有在聖殿門口值班个警衛，將上主聖殿肚所有用來拜巴力、亞舍拉女神㧯天象个用品全部搬出去。王在耶路撒冷城外汲淪溪滣將這兜用品全部燒掉，然後喊人將灰帶到伯特利。
5 以前猶大列王所設立拜偶像个祭司，佢等在猶大㧯耶路撒冷附近城鎮个神廟燒香，王這下將佢等廢掉；佢又廢掉所有向巴力、日頭、月光、星座、㧯天上萬象燒香个祭司。
6 佢又對上主聖殿肚將亞舍拉女神像搬走，帶到耶路撒冷城外汲淪溪滣燒掉，捶到變粉，委在公共个塚埔。
7 佢拆掉神廟个男娼在上主聖殿霸佔个宿舍，就係該兜婦女為亞舍拉刺布篷个地方。
8 佢將猶大逐城个眾祭司帶到耶路撒冷來，破壞佢等燒過香个神廟，對迦巴到別是巴。佢又拆掉城門堘獻給山羊神个神廟；這神廟在市長約書亞个門前，在入城大門个左片。
9 該兜神廟个祭司做毋得在上主个聖殿事奉，總係做得食供給其他祭司个無酵餅。
10 約西亞王又破壞欣嫩子山壢个陀斐特，不准人民在該位將自家个子女用火燒來獻給摩洛神。
11 佢也徙走以前猶大列王拜日頭所獻个馬仔，燒掉拜日頭用个戰車。(這兜東西本來放在上主聖殿庭院肚个殿門堘頭，離拿單‧米勒大臣个屋下無幾遠)。
12 以前猶大列王在亞哈斯王宮屋頂起个祭壇，㧯瑪拿西王在聖殿兩院中起个祭壇，也全部被約西亞王拆淨淨。佢將祭壇敲碎，㧒在汲淪山壢底背。
13 約西亞破壞所羅門王起在山岡頂个神廟，就係該兜在耶路撒冷東片、橄欖山南片，為到拜西頓女神亞斯她錄、摩押神基抹、亞捫神摩洛這兜邪惡个偶像所起个神廟。
14 約西亞敲碎石柱，斬橫亞舍拉女神像，在原來頓柱仔个地方滿遍放死人骨頭。
15 約西亞也拆掉在伯特利个祭壇，㧯害以色列人犯罪个尼八个孻仔耶羅波安王起个神廟。約西亞拆掉神廟，將它燒掉，捶到變粉，又將亞舍拉女神像燒掉。
16 約西亞轉身看到山頂有兜墳墓，就派人對墳墓底背將骨頭挖出來，放在祭壇頂燒掉。佢用這種方法羞辱祭壇，就像以前神人所預言上主个話，就係當耶羅波安在節期中企在祭壇堘个時講个。約西亞又看到講這預言神人个墳墓。
17 佢問：「該係麼人个墳墓？」伯特利人應講：「係該位對猶大來个神人个墳墓。你頭先在伯特利祭壇頂所做个，佢早就預言了。」
18 約西亞命令講：「保留該墳墓；毋好徙佢个骨骸。」所以，該神人个骨骸無被人徙挺動；該對撒馬利亞來个先知个骨骸也無被人徙挺動。
19 約西亞在撒馬利亞逐城將以前以色列列王起个、惹上主發譴个神廟全部拆掉。像佢在伯特利所做个，佢廢掉所有个神廟。
20 佢將所有神廟个祭司在祭壇頂㓾掉，也在祭壇頂高燒死人个骨頭，後來就轉耶路撒冷去。
21 約西亞王命令人民遵照約書底背个記載守𨃟過節，紀念上主—佢等个上帝。
22 自從該兜士師治理以色列以來，包含以色列列王㧯猶大列王个時，毋識恁盛大守𨃟過節；
23 只有約西亞王在位个第十八年，王㧯人民在耶路撒冷慶祝𨃟過節。
24 約西亞將耶路撒冷㧯猶大地區所有交鬼个、算命个、所有屋下个神明、偶像、㧯一切拜邪神个東西全部除掉，來實行大祭司希勒家在上主聖殿肚所發現該本法律書所寫个話。
25 在約西亞以前，無一個王像佢恁樣全心、全意、全力歸向上主，遵行摩西所頒佈个法律；在佢以後，也無一個王像佢恁樣。
26 總係，上主因為瑪拿西王所做个事向猶大大發譴，到這下還吂過。
27 上主講：「𠊎愛對付猶大像𠊎對付以色列共樣。𠊎愛對𠊎面前逐出猶大人民；𠊎愛豁掉𠊎所選个城—耶路撒冷㧯𠊎講過愛做敬拜𠊎个聖殿。」
28 約西亞其他个事全部記在《猶大列王史》底背。
29 佢在位个時，埃及王尼哥帶領軍隊到幼發拉底河幫助亞述皇帝。約西亞王就去米吉多抵抗埃及王，卻死在佢个手中。
30 佢个部下將佢个屍體放在戰車肚，運轉耶路撒冷，葬在王室个墳墓肚。猶大人民選約西亞个孻仔約哈斯，膏油設立佢，承接厥爸做王。
31 約哈斯二十三歲个時做猶大王；佢在耶路撒冷統治三個月。厥姆安到哈慕她，係立拿城葉利米个妹仔。
32 約哈斯學厥祖先个壞模樣，行上主看做邪惡个事。
33 埃及王尼哥將約哈斯捉去關在哈馬地个利比拉，毋俾佢治理耶路撒冷，又罰猶大國賠償三千四百公斤銀仔㧯三十四公斤金仔。
34 尼哥王立約西亞个孻仔以利亞敬接約西亞做猶大王，將佢个名改做約雅敬。尼哥王將約哈斯帶到埃及；約哈斯死在該位。
35 為到愛繳納埃及王要求个賠償，約雅敬王就照人民个經濟強收稅金。
36 約雅敬二十五歲个時做猶大王；佢在耶路撒冷統治十一年。厥姆安到西布大，係魯瑪城比大雅个妹仔。
37 約雅敬學厥祖先个壞模樣，行上主看做邪惡个事。